Azərbaycan, Bakı, 15 fevral / Trend , müxbir E.İsmayılov/
Xəzər dənizinin Azərbaycan sektorunda yerləşən "Azəri-Çıraq-Günəşli" (AÇG) neft yataqlar blokunda hazırda sutkalıq hasilat təxminən 850 min barel təşkil edir. Bu barədə bazar ertəsi BP (yatağın işlənməsi layihəsinin operatoru) məlumat verib.
"Hazırda "Azəri-Çıraq-Günəşli" yataqlar blokundan sutkalıq təxminən 850 min ton neft hasil edilir", - mənbədə deyilir.
"Azəri-Çıraq-Günəşli" layihəsi üzrə birgə işləmə və hasilatın pay bölgüsü barədə saziş 1994-cü ilin sentyabrında imzalanıb. Müqavilənin fəaliyyət müdəti 30 ildir. "Çıraq" yatağında hasilat 1997-ci ildə, "Mərkəzi Azəri"də 2005-ci ilin əvvəlində, "Qərbi Azəri"də 2006-cı ilin əvvəlində, "Şərqi Azəri"də isə 2006-cı ilin sonunda başlanıb. 2008-ci ilin aprel ayının sonunda "Günəşli" yatağının dərin su hissələrində hasilata başlanılıb.
"Azəri-Çıraq-Günəşli" yataqlar blokunun səhmdarları bunlardır: ВР (operator - 34,1%), Chevron (10,2%), ARDNŞ (10%), INPEX (10%), StatoilHydro (8,6%), ExxonMobil (8%), TRAO (6,8%), Devon (5,6%), ITOCHU (3,9%), Hess (2,7%).
AÇG-də hasil edilən neftin ümumi həcminin 90 min bareli qərb boru kəməri "Bakı-Supsa" ilə nəql olunur. Boru kəmərinin operatoru BP şirkətidir.
AÇG-da sutkada hasil edilən qalan 760 min barel neft isə Bakı-Tbilisi-Ceyhan neft kəməri ilə nəql olunur.
BTC boru kəmərinin ümumi uzunluğu 1768 kilometrdir. Bunun 443 kilometri Azərbaycan, 249 km-i Gürcüstan, 1076 km-i Türkiyə ərazisindən keçir. Boru kəmərinin tikintisi 2003-cü ildə, onun neftlə doldurulması isə 2005-ci il mayın 18-də başlayıb.
Bu ilin fevral ayının birinə olan məlumata əsasən, neft kəməri fəaliyyətə başlayandan bəri onun vasitəsilə 109,6 milyon ton neft nəql olunub.
