Azərbaycan, Bakı, 13 aprel /Trend /
ARDNŞ-in Marketinq və İqtisadi Əməliyyatlar İdarəsi yanvar-mart aylarında "Bakı-Tbilisi-Ceyhan" (BTC) boru kəməri vasitəsilə 6,2 milyon tondan çox Azərbaycan nefti ixrac edib. Keçən ilin analoji dövründə bu göstərici 6,1milyon tondan artıq təşkil edib. Bu barədə MİƏİ-nin məlumatında deyilir. ARDNŞ 2009-cu ildə BTC vasitəsilə 24,6 milyon ton neft ötürüb.
ARDNŞ 2008-ci ildə BTC vasitəsilə 20,5 milyon tona yaxın neft ixrac edib. 2007-ci ildə bu göstərici 6,5 milyon ton, 2006-cı ildə isə 1,403 milyon ton təşkil edib (bu marşrut vasitəsilə neft ixracı 2006-cı ilin may ayında başlayıb).
BTC boru kəmərinin ümumi uzunluğu 1768 kilometrdir ki, bunun da 443 km.-i Azərbaycanın, 249 km.-i Gürcüstanın, 1076 km.-i isə Türkiyə ərazisindən keçir. Boru kəmərinin inşasına 2003-cü ilin aprelində, neftlə doldurulmasına isə 2005-ci ilin mayında başlanılıb.
BTC neft kəmərinin inşası 4 milyard dollara başa gəlib. Bu, inşaat işlərinə sərf edilən vəsaitdir. Boru kəmərinin doldurulması, maliyyə xərcləri və bank faizləri bu məbləğə daxil deyil. Ümumi maliyyə kreditinin məbləği 2,6 milyard dollar təşkil edir.
BTC Co-nun səhmdarları aşağıdakılardır: bp (30,1 faiz); AzBTC (25 faiz); Chevron (8,90 faiz); Statoil (8,71 faiz); ТРАО (6,53 faiz); Eni (5 faiz ); Total (5 faiz); Itochu (3,40 faiz ); Inpex (2,50 faiz); ConocoPhillips (2,50 faiz) və Amerada Hess (2,36 faiz).
