Azərbaycan, Bakı, 26 aprel /Trend, müxbir E.İsmayılov/
ARDNŞ (Azərbaycan Respublikası Dövlət Neft Şirkəti) "Bulla-Dəniz" qaz yatağında (Bulla-Dəniz - 82 platforması) dərin kəşfiyyat quyusu qazmaq işlərini müvəqqəti olaraq dayandırıb. Bu barədə ARDNŞ-dəki mənbə bildirib. Əvvəllər qazma işlərinin 2011-ci ilin əvvəlinə yekunlaşması nəzərdə tutulurdu.
"Hazirda quyuqazma işləri həyata keçirilmir. Bu, texniki işlərin aparılması ilə, xüsusilə də qazma maye üçün rezervuar quraşdırılması ilə bağlıdır", - mənbə deyib.
Onun sözlərinə görə, hazırda quyunun dərinliyi 3500 metr təşkil edir. Layihə üzrə dərinlik 6400 metrdir.
"Bulla-Dəniz" yatağı 1975-ci ildən istismardadır. 34 il ərzində quyudan 62 milyard kubmetr qaz və 11 milyon ton kondensat hasil edilib.
"Bulla-Dəniz" yatağından sutkada 450 min kubmetr qaz hasil edilir. ARDNŞ geoloqlarının fikrincə, bu yataqda hasilatı bir neçə dəfə artırmaq olar.