Azərbaycan, Bakı, 18 may /Trend, müxbir E.İsmayılov/
"Abşeron" dəniz strukturunda kəşfiyyat quyusunun qazılmasının oktyabrda Heydər Əliyev adına qazma qurğusu (qurğunun sahibi Maersk Drilling şirkətidir) vasitəsilə aparılması planlaşdırlır. Bu barədə ARDNŞ-nin (Azərbaycan Respublikası Dövlət Neft Şirkəti) qazma şöbəsinin rəhbəri Şaiq Bəkirov çərşənbə axşamı məlumat verib.
"Quyunun ilkin layihə dərinliyi 7 140 metr təşkil edir", - Bəkirov deyib.
Quyu əvvəl qazılmış kəşfiyyat quyusuna nisbətən yeni nöqtədə yerləşəcək. Mütəxəssislərin fikrincə, yeni qazma nöqtəsi birincidən uğurlu olacaq.
Gələcək 3 il müddətində əlavə iki kəşfiyyat quyusunun qazılması mümkündür. "Abşeron" bloku Bakıdan 100 km aralıda suyun 500 metr dərinliyində yerləşir.
Abşeron layihəsinin iştirakçıları: ARDNŞ - 40% Fransanın Total şirkəti - 40% və Gaz De France Suez - 20%.
"Abşeron" strukturu üzrə müqavilə 2009-cu il fevralın 27-də ARDNŞ və Total şirkəti arasında imzalanıb. Total daha sonra müqavilədəki iştirak payının 20%-ni Gaz De France Suez şirkətinə verib.
Xarici şirkətlər artıq ikinci dəfədir ki, "Abşeron" perspektivli strukturunda ticari cəlbedici karbohidrogenlərin hasilatına başlamağa cəhd edir. 1997-ci ildə layihədə 50%-lik iştirak payı əldə edən ARDNŞ və ABŞ-ın ChevronTexaco (şirkət iştirak payının 30%-ni layihənin operatoruna verib) və Total arasında bu sahənin işlənməsi və kəşfiyyatına dair PSA tipli ilk müqavilə imzalanıb. Lakin kəşfiyyat quyusunun qazılmasından sonra yataqda aşkar edilmiş ehtiyatlar kommersiyaya cəlbedici olmadığından müqavilə yekunlaşıb.