...

ARDNŞ Naxçıvan Muxtar Respublikasını qazla təmin etmək üçün yeni qaz kəməri tikəcək

Energetika Materials 25 İyun 2010 20:36 (UTC +04:00)

Azərbaycan, Bakı, 25 iyun /Trend/

Azərbaycan Respublikası Dövlət Neft Şirkəti (ARDNŞ) "Yanacaq-enerji kompleksinin inkişafı (2005-2015-ci illər) üzrə Dövlət Proqramı" cərcivəsində ölkənin qaz təsərrüfatının müasir tələblərə cavab verən səviyyədə yenidən qurulması istiqamətində tədbirlərin həyata keçirilməsi məqsədilə 2010-2013-cü illər ərzində qaz təsərrüfatının əsaslı inkişaf proqramını müəyyənləşdirib. Bu barədə ARDNŞ-nin cümə günü yayılan məlumatında deyilir.

Qaz təsərrüfatının müasir tələblərə cavab verən səviyyədə yenidən qurulması istiqamətində tədbirlərin həyata keçirilməsi ARDNŞ-nin "Azəriqaz" İstehsalat Birliyinə həvalə edilib.

Proqrama əsasən 554 kilometrlik magistral qaz kəmərlərinin yenidən qurulması, ümumi uzunluğu 360 kilometr olan "Qalmaz-Astara", "Mincəçevir qazpaylayıcı stansiyası - "Azərbaycan" İstilik Elektrik Stansiyası", 90 atmosfer təzyiqli "Səngəçal-Qalmaz Yeraltı Qazsaxlama Anbarı" magistral qaz kəmərlərinin çəkilişi nəzərdə tutulub.

Naxçıvan Muxtar Respublikasının təbii qaz təchizatının təkmilləşdirilməsi məqsədi ilə qaz anbarının və 180 kilometr uzunluğunda, 6 qazpaylayıcı stansiyaya malik "İqdır-Sədərək" kəmərinin tikintisi, regionlarda qaz təminatının yaxşılaşdırılması üçün yeni paylayıcı stansiyaların inşa edilməsi və köhnə stansiyaların yenidən qurulması da nəzərdə tutulub.

Proqrama həmçinin Bakıda 557 min, regionlarda isə 401 min ədəd smart-kart tipli qaz sayğacının quraşdırılması da daxildir. Hazırda bu istiqamətdə işlər uğurla davam etdirilir. Regionların qazlaşdırılması istiqamətində görüləcək işlər 55 inzibati rayon və şəhər üzrə 1949 kənd, qəsəbə və yaşayış massivini əhatə edəcək.

Xəbər lenti

Xəbər lenti