Azərbaycan, Bakı, 3 noyabr /Trend/
Yanvar-oktyabr aylarında ARDNŞ tərəfindən Azərbaycanın daxili tələbatının ödənilməsi və ixrac əməliyyatlarının təmin olunması üçün 8,4 milyard kubmetrdən çox qaz tədarük edilib. Bu barədə ARDNŞ-in çərşənbə günü yayılan məlumatında bildirilir.
Məlumatda deyildiyinə görə, istifadə edilən qazın ümumi həcmindən 7,2 milyard kubmetrə yaxını sənaye müəssisələrinə, əhali və "Azərenerji" SC-yə ötürülüb. Qalan həcm Gürcüstan və Rusiya ilə ixrac əməliyyatlarının təmin edilməsinə, eləcə də Naxçıvan Muxtar Respublikasının təbii qazla təmin olunmasına sərf edilib.
Yanvar-oktyabr aylarında ARDNŞ ölkənin qaz sisteminə 9,4 milyard kubmetrdən çox qaz tədarük edib ki, bu da proqnozlaşdırılandan 880,8 milyon kubmetr çoxdur. Bundan başqa, sənaye müəssisələrinin, əhalinin və ixrac sazişləri çərçivəsində öhdəliklərin təmini üçün ölkənin yeraltı qaz anbarlarına 638,7 milyon kubmetrədək qaz vurulub. Bununla yanaşı, bu dövrdə qaz anbarlarına əlavə olaraq 1,64 milyard kubmetrə yaxın qaz vurulub.
NMR-i qazla təchiz etmək üçün İranla aparılan "svop" əməliyyatları çərçivəsində yanvar-oktaybr aylarında 273,7 milyon kubmetr qaz ötürülüb. Sentyabrda bu göstərici 10,1 milyon kubmetrə yaxın olub.