Azərbaycan, Bakı, 28 dekabr /Trend, müxbir E.İsmayılov/
Xəzərin Azərbaycan sektorundakı "Şahdəniz" qaz-kondensat yatağının işlənməsinin texniki operatoru olan Britaniyanın BP şirkəti 2011-ci ilin yanvar-fevralında müqavilə meydanında yeni - beşinci hasilat quyusunu istismara verə bilər. Bu barədə çərşənbə axşamı neft-qaz bazarındakı mənbə məlumat verib.
Onun sözlərinə görə, hazırda dərinliyi 6959 metr təşkil edən quyunun mənimsənilməsi üzrə işlər həyata keçirilir.
"Hazırda quyuda işlər davam edir. Yeni hasilat quyusu gələn il yanvarın sonu - fevralın əvvəllərində istismara verilə bilər", - mənbə bildirib.
Hazırda yataqda dörd quyudan qaz hasil edilir. "Şahdəniz"də platformadan sutkalıq qaz hasilatı sutkada 20-23 milyon kubmetr təşkil edir. Yeni quyunun istismara verilməsindən sonra o, sutkada 25-26 milyona çata bilər.
Yataqda ən yüksək hasilat 8,6 - 9 milyard kubmetr səviyyəsində proqnozlaşdırılır. Proqnozlara əsasən, yatağın işlənməsinin ikinci mərhələsində qaz hasilatının həcmini ildə 25 milyard kubmetrə qədər artırmaq olacaq.
"Şahdəniz" yatağının ehtiyatları 1,2 trilyon kubmetr qaz həcmində qiymətləndirilir.
"Şahdəniz" yatağı üzrə müqavilə 1996-cı il iyunun 4-də imzalanıb. Müqavilə iştirakçıları bunlardır: BP (operator) - 25,5%, Statoil - 25,5%, NICO - 10%, Total - 10%, LukAgip - 10%, TPAO - 9%, ARDNŞ - 10%.