Azərbaycan, Bakı, 11 yanvar /Trend, müxbir E.İsmayılov/
Bakıda nəzarət-ölçü məntəqələrinin fəaliyyəti ARDNŞ-nin balansında olan, ekoloji standartlara uyğun gəlməyən avtomobillərin sayını əhəmiyyətli dərəcədə azaltmağa imkan yaradıb. Bu barədə çərşənbə axşamı ARDNŞ-dən məlumat verilib.
Onun sözlərinə görə, hazırda respublikanın digər regionlarında ARDNŞ tərəfindən bu cür nəzarət-ölçü məntəqələrinin açılması mümkünlüyünə baxılır.
"Bu məsələ nəzərdən keçirilir, lakin müddət barədə danışmaq hələ tezdir", - mənbə deyib.
Bundan əvvəl ARDNŞ-nin Ekologiya İdarəsi rəhbərinin müavini Vüqar Kərimovun bildirdiyi kimi, ARDNŞ-nin avtomobil vasitələrinin ekoloji standartlara uyğun gəlib-gəlmədiyini yoxlamaq üçün hazırda şirkətin üç nəzarət-ölçü məntəqəsi var. 2011-2012-ci illərdə şirkət bütün respublika üzrə, xüsusilə Şəki, Yevlax, Quba-Qusar bölgəsi, Gəncə və Naxçıvanda daha beş belə məntəqə açmağı planlaşdırır.
ARDNŞ-nin Ekologiya İdarəsi ilk olaraq avtomobil vasitələrinin Avro-2 ekoloji standartlarına uyğun gəlib-gəlmədiyini yoxlamaq üçün akkreditasiya alıb.
Mənbənin bildirdiyi kimi, hazırda laboratoriya ARDNŞ-nin idarə və müəssisələrinə, həmçinin fiziki şəxslər, elmi-tədqiqat institutlarına xidmətlər göstərir.
"Avtomobillərin Avro-2 standartlarına uyğun gəlməsi barədə təhlillərin aparılması ilə bağlı müraciətlər hələ daxil olmayıb", - mənbə deyib.
ARDNŞ-nin tərkibinə daxil olmayan təşkilatlara bu cür xidmətlər göstərmək üçün idarəyə müvafiq müraciət daxil olmalıdır. Kənar müəssisələrə göstərilən xidmətlər ödənişli olacaq.
Avtomobil vasitələrinin Avro-2 standartlarına müvafiqliyi barədə tədqiqatların aparılması sahəsində laboratoriyalara xidmətlər göstərmək üçün lisenziyanı Standartlaşdırma, Metrologiya və Patent üzrə Dövlət Komitəsi təqdim edir.
İyul ayından Azərbaycanda ölkəyə gətirilən avtomobil vasitələrinə Avro-2 ekoloji standartları tətbiq olunmağa başlayıb.