Azərbaycan, Bakı,11 fevral /Trend/
2011-ci ilin yanvarında ARDNŞ (Azərbaycan Respublikası Dövlət Neft Şirkəti) Azərbaycanın daxili tələbatının ödənilməsi və ixrac-idxal əməliyyatlarının təmin olunması üçün 1,4 milyard kubmetrdən çox qaz sərf edib. Ötən ilin analoji dövründə bu göstərici 158,4 milyon kubmetr təşkil edib. Bu barədə şirkətin cümə günü yaydığı məlumatda deyilir.
Məlumata görə, sərf olunan qazın 1,1 milyard kubmetri sənaye müəssisələrinə, əhaliyə və "Azərenerji" SC-yə (Azərbaycanda elektrik enerjisinin istehsalı və paylanması) verilib.
Yerdə qalan həcm Gürcüstan və Rusiya ilə aparılan ixrac əməliyyatlarının, eləcə də Naxçıvan Muxtar Respublikasının (NMR) təbii qazla təmin olunmasına sərf olunub.
Yanvarda ARDNŞ tərəfindən ölkənin qaz sisteminə 864 milyon kubmetr qaz satılıb. Bununla yanaşı, sənaye müəssislərinin, əhalinin və ixrac əməliyyatları çərçivəsində öhdəliklərin yerinə yetrilməsi üçün ölkənin yeraltı qaz anbarlarından 551 milyon kub metr qaz götürülüb.
Yanvarda NMR-in qazla təmin olunması üçün İranla aparılan svop əməliyyatları çərçivəsində 38 milyon kubmetrdən artıq qaz verilib.
Ötən il daxili tələbatın ödənilməsi və ixrac-idxal əməliyyatlarının təmin olunması üçün 11,5 milyard kubmetrdən çox qaz sərf edilib.
