Gürcüstan, Tbilisi, 15 fevral /Trend, müxbir N.Kirsxaliya/
Gürcüstanda neft emalı zavodunun (NEZ) tikintisi üçün bir milyard dollar lazım olacaq. Trend-in məlumatına görə, bu barədə Gürcüstanın energetika naziri Aleksandr Xetaquri bildirib. Gürcüstan Prezidenti parlamentdə son çıxışı zamanı bəyan edib ki, ölkə tərəfdaşlarla birlikdə NEZ tikmək niyyətindədir.
Xetaqurinin sözlərinə görə, ayın sonunadək tenderin qalibi olan şirkətlə NEZ-in tikintisi üçün texniki iqtisadi əsaslandırmanın hazırlanmasına dair saziş imzalanacaq.
"Gürcütanın Neft və Qaz Korporasiyası ötən il tender elan edib və saziş qalib gələcək şirkətlə bağlanacaq", - o deyib.
Xetaquri qeyd edib ki, Gürcüstan tərəfi ildə 4,5 milyon ton neft emal edə biləcək zavod tikmək istəyir.
"Bu bizim istəyimizdir, reallıqda nəyin olacağını isə TİƏ-nin hazırlanmasından sonra biləcəyik", - o qeyd edib.
Nazirin sözlərinə görə, Azərbaycanla neft tədarükünə dair danışıqlar gedir və yaxşı olardı ki, Azərbaycan tərəfi NEZ-in tikintisində iştirak etsin.
NEZ-in tikintisinə maliyyələşmənin cəlb edilməsi 2012-ci il aprelin 1-dən etibarən başlayacaq.
"Tikintiyə dövlətlə yanaşı, özəl sektor da qoşula bilər. Biz bu məsələdə azərbaycanlı və digər tərəfdaşlarımıza güvənirik", - o əlavə edib.
