Azərbaycan, Bakı, 3 mart /Trend, müxbir A.Bədəlova/
"Ağ axın" layihəsinin rəhbərliyi bu qaz kəmərini Aİ-nin "Cənub enerji dəhlizi" çərçivəsində tikilə biləcək digər boru kəmərlərinə rəqib hesab etmir. Böyük Britaniyaya məxsus "White Stream Pipeline Company" şirkətinin rəhbəri Roberto Pirani bunu onunla izah edir ki, "Ağ axın" "Cənub dəhlizi"nin ayrılmaz hissəsidir və ona görə də "Şahdəniz-2" çərçivəsində hasil olunan Azərbaycan qazı uğrunda digər boru kəmərləri ilə rəqabət aparmır.
"Hesab edirik ki, hazırkı layihələr arasında rəqabət Xəzərdəki yataqların işlənməsi aspektlərindən yalnız biridir. Biz hesab edirik ki, hərçənd ən aşkar olsa da, indiki layihələrin arasında rəqabət yalnız Xəzərdə yataqların işlənməsinin aspektlərindən biridir. Rəqabətə səhv istiqamətlənmə hələlik səmərəli nəticələr verməyib", - Pirani elektron poçtla Trend-ə bildirib.
Onun sözlərinə görə, "Ağ axın"ın həyata keçirilməsi Türkmənistanda quruda və dənizdə hasil olunan qaz üçün də əhəmiyyətli ixrac imkanları açır.
"Xəzərdəki yataqların işlənməsi məsələsində nisbətən sürətli uğur "Cənub qaz dəhlizi" layihələrinin birgə həyata keçirilməsi yolu ilə təmin edilə bilər", - o deyib.
"Bu, Azərbaycanın 10-15 il ərzində böyük həcmdə qaz hasil etmək və satmaqla Avropanın emal bazarlarına çıxması, eləcə də Türkmənistan qazı üçün tranzit ölkə olmaqla bağlı planlarının həyata keçirilməsinin təmin olunmasının nisbətən daha asan və daha yaxşı üsuludur", - Pirani bildirib.
Enerji tədarükünün mənbə və marşrutlarını diversifikasiya edəcək və bununla da Aİ-nin enerji təhlükəsizliyini artıracaq "Cənub dəhlizi" layihəsi Avropa İttifaqı üçün prioritet enerji layihələrindən biridir. "Cənub dəhlizi" layihəsinə "Nabukko" qaz kəməri, Transadriatik qaz kəməri (TAP), "Ağ axın", ITGI (Türkiyə-Yunanıstan-İtaliya qaz kəməri) daxildir.
"Cənub enerji dəhlizi" layihələrinin səhmdarları Azərbaycan qazına öz kəmərlərinin reallaşdırılmasının birinci mərhələsində onların doldurulması üçün əsas mənbə kimi baxırlar. Eləcə də Azərbaycanın "Şahdəniz" yatağının işlənməsinin 2017-ci il üçün nəzərdə tutulan ikinci mərhələsində hasil olunacaq qaza da ümid bəslənilir.
"Ağ axın" layihəsi Azərbaycan qazının Gürcüstanın Supsa limanından Qara dəniz vasitəsilə Rumıniyanın Konstansa limanına və digər Aİ ölkələrinə boru kəməri ilə nəqlini nəzərdə tutur.
Boru kəmərinin ilkin gücü ildə 8 milyard kubmetr təşkil edəcək, sonralar 16, daha sonralar isə 32 milyard kubmetrədək artırılacaq.
Layihənin reallaşdırılması bir neçə mərhələdən ibarət olacaq. Onlardan birincisi Gürcüstandan Rumıniyaya Qara dənizlə uzanacaq sualtı boru kəmərinin çəkilməsini nəzərdə tutur.
Kəmərin ümumi uzunluğu dənizin dibi ilə 1100 kilometr təşkil edəcək. Boru kəməri 200 metr dərinlikdən keçəcək.