Azərbaycan, Bakı, 3 mart /Trend, müxbir E.İsmayılov/
"Şimal" istilik elektrik stansiyasının ikinci buxar-qaz qurğusunun (BQQ) tikintisi çərçivəsində layihələşdirmə işlərinə başlanılıb. Bu barədə cümə axşamı Trend-ə "Azərenerji" ASC-dəki (Azərbaycanda elektrik enerjinin istehsalı və paylanması) mənbə bildirib.
"Bu gün bu layihə çərçivəsində layihələşdirmə işlərinə başlanılıb", - mənbə qeyd edib.
Bir müddət əvvəl ASC rəhbəri Etibar Pirverdiyev bildirib ki, stansiyanın tikintisinə 2011-ci ildə başlamaq lazım gələcək. İkinci buxar-qaz qurqusunun tikintisi layihəsinin reallaşdırılmasının dəyəri əvvəllər ehtimal olunan 450 milyon dollara nisbətdə 360 milyon dollar təşkil edir. Dəyər hətta birinci buxar-qaz qurqusunun yenidən qurulması, ikincidə isə sərinləşdirici qurğunun, dəniz suyunun verilməsi üçün şirinləşdirici qurğunun tikilməsi şərti ilə də aşağı düşüb. Həmçinin, hər iki qurğu üçün yarımstansiyaların tikintisi nəzərdə tutulub. İşlərin görülməsi üçün avadanlıqları "Mitsui", "Siemens" və "Alstom" şirkətləri tədarük edəcəklər.
Hazırda "Şimal" stansiyasında 400 meqavat gücə malik bir qurğu mövcuddur, tikintinin əsas podratçıları "Mitsui Heavy Industries" və "Mitsubishi" şirkətləridir.
İkinci BQQ-nin 2009-cu ildə istismara verilməsi planlaşdırılmışdı. Tenderlərin baş tutmaması üzündən bu layihə dayandırıldı. Layihənin TİƏ-si 2004-cü ildə TEPSCO (Yaponiya-Enprima (Finlandiya) konsaltinq şirkətləri alyansı tərəfindən hazırlanıb. Tender dörd 220 kilovoltluq elektrikötürücü xəttin və 220/110 kilovoltluq yarımstansiyanın layihələşdirilməsi, təchizat, tikinti-quraşdırma işləri, sınaqların keçirilməsi və istismara verilmə üzrə elan edilib.
