Azərbaycan, Bakı, 21 iyun /Trend, müxbir E.İsmayılov/
Yaxın vaxtlarda ARDNŞ-nin Geologiya və Geofizika İdarəsi və Britaniyanın BP şirkəti Xəzərdə xidmət göstərilməsi üzrə bir sıra müqavilələr imzalayacaqlar. Bu barədə çərşənbə axşamı Trend-ə ARDNŞ-dəki mənbə məlumat verib.
Onun sözlərinə görə, ARDNŞ BP üçün Xəzərdə bəzi geofiziki işləri artıq yerinə yetirib və hazırda əldə olunan məlumatların təhlili aparılır.
"İndi məlumatların təhlili üzrə işlər aparılır və yaxın vaxtlarda görülən işlər üzrə daha beş-altı müqavilə imzalanacaq", - mənbə deyib.
Bir müddət əvvəl ARDNŞ-nin Geologiya və Geofizika İdarəsi və BP arasında anlaşma memorandumu imzalanıb. Sənəd 2010-cu il dekabrın 3-də imzalanıb. Sənəddə tərəflərin gələcəkdə kəşfiyyat, seysmik məlumatların emalı, geoloji-geofiziki xəritələrin hazırlanması və digər texniki xidmətlərin göstərilməsi məqsədi ilə ümumi müqavilə imzalamaq niyyəti əks olunur.
Memorandum Azərbaycandakı iri neft-qaz layihələrinin iştirakçısı olan Britaniya şirkəti üçün xidmətlərin göstərilməsi prosesini asanlaşdırmaq məqsədi güdür. Memorandumun şərtlərinə görə, o, Geologiya və Geofizika İdarəsinə ARDNŞ-dən icazə almadan şirkətin iştirak etdiyi layihələr üzrə informasiya vermək və xidmətlər göstərmək imkanı verir. İdarə Azərbaycandakı digər layihələr çərçivəsində məlumat almaq və xidmətlərdən istifadə etmək üçün ARDNŞ-dən mütləq xüsusi icazəyə malik olmalıdır.
ВР Azərbaycanın Xəzərdəki "Azəri-Çıraq-Günəşli" neft-qaz yataqlar blokunun işlənməsi layihəsinin operatorudur, eləcə də "Şahdəniz" qaz-kondensat yatağının işlənməsinin texniki operatoru kimi çıxış edir. Ötən il ARDNŞ ilə BP arasında Xəzərdə yerləşən perspektiv "Asiman-Şəfəq" strukturunun kəşfiyyatı və işlənməsi üzrə müqavilə imzalanıb.