Azərbaycan, Bakı, 29 iyun /Trend, müxbir E.İsmayılov/
ARDNŞ Kulevi terminalı vasitəsilə maye polietilen və propilenin daşınmasının mümkünlüyü ilə bağlı layihə məlumatlarını öyrənir. Bu barədə çərşənbə günü ARDNŞ-dakı mənbə deyib.
"Kimyəvi məhsulların daşınmasının nəzəri imkanlarına baxılır, lakin hər şey hələ ki layihə məlumatlarının öyrənilməsi mərhələsindədir", - mənbə bildirib.
Onun sözlərinə görə, bu layihənin həyata keçirilməsinin mümkünlüyü barədə tədqiqat işləri başa çatdıqdan sonra danışmaq olar.
Daşınma üçün xammal kimi ARDNŞ-nin "Azərikimya" İB-nin istehsal etdiyi maye polietilen və propilen nəzərdən keçirilir. İB Azərbaycanda kimyəvi məhsulların iri istehsalçısıdır.
Kulevi terminalı istismara 2008-ci ilin mayında verilib. Neft məhsullarının faktiki olaraq boşaldılmasına iyundan başlanıb. Terminalda yüklərin yüklənib-boşaldılmasının ümumi gücü ildə 10 milyon ton neft yüküdür. Bura üç milyon ton neft, üç milyon ton dizel yanacağı, dörd milyon ton mazut daxildir. Rezervuar parkının ümumi tutumu 320 min kubmetr təşkil edir və 380 min kubmetrədək artırılması mümkündür.
Neft əməliyyatları üçün terminalda neft məhsullarının 100 min tonadək yükgötürmə qabiliyyətinə malik tankerə doldurulması üçün iki yanalma körpüsünün tikintisi nəzərdə tutulub. Məhsuldarlıq saatda 1000-dən 8000 kubmetrədək neft doldurulması təşkil edir. Müəssisədə liman, dəmiryol stansiyası da var ki, burada eyni vaxtda yükün boşaldılmasını gözləyən 180 vaqon-sistern yerləşdirmək mümkündür. Dəmiryol estakadalarında eyni vaxtda 168 vaqon-sisternin boşaldılması mümkündür.
