Azərbaycan, Bakı, 20 iyul /Trend, müxbir E.İsmayılov/
Dünya maliyyə bazarlarında faiz dərəcələrinin minimal səviyyəyədək azalması son onillik ərzində Azərbaycan Respublikası Dövlət Neft Fondunun (ARDNF) əsasən stabil gəlirə malik qiymətli kağızlar şəklində olan investisiya portfelinin gəlirlərinə mənfi təsir göstərib. Bu barədə çərşənbə günü Trend-ə Fonddan bildiriblər.
"Faiz dərəcələrinin azalmasının əsas səbəbi odur ki, dünya maliyyə böhranından sonra dünyanın aparıcı ölkələrinin mərkəzi bankları iqtisadi artımın stimullaşdırılması üzrə (faiz dərəcələrinin azaldılması yolu ilə) tədbirlər həyata keçirməyə başlayıblar", - Neft Fondundan deyiblər.
Xüsusilə, ABŞ Federal Ehtiyat Bankının və Böyük Britaniya Mərkəzi Bankının məqsədli faiz dərəcələri müvafiq olaraq 0,25 və 0,5 faiz təşkil edir. Avropa Mərkəzi Bankının uçot dərəcəsi yalnız bu yaxınlarda 1,5 faizədək artırılıb.
"Lakin hətta bu dərəcə də tarixi orta faiz dərəcəsi ilə müqayisədə xeyli aşağı hesab edilir", - Fonddan qeyd ediblər.
ARDNF-in uzunmüddətli investor olması nəzərə alınmaqla, hazırda gəlirin artırılması məqsədilə Fond tərəfindən daha da şaxələndirilmiş investisiya portfelini nəzərdə tutan yeni investisiya siyasəti hazırlanır.
Yeni siyasətə uyğun olaraq daha riskli aktivlərin, məsələn, səhmlərin xüsusi çəkisinin ARDNF-in investisiya portfelində artırılması nəzərdə tutulur.
ARDNF-dən dediklərinə görə, ilin birinci yarısının yekunlarına əsasən, investisiya portfelinin idarə edilməsindən digər valyutalarla müqayisədə Avropa valyutasında böyük gəlir əldə edilib. "Bu onunla əlaqədardır ki, avro üzrə faiz dərəcələri digər valyutalarla müqayisədə (dollar və funt-sterlinq) bir qədər yüksəkdir", - Fonddan qeyd ediblər.
Dövlət Neft Fondu 1999-cu ildə yaradılıb və həmin vaxt onun aktivləri 271 milyon dollar olub.
ARDNF-in Nizamnaməsinə görə, Fondun vəsaitləri strateji baxımdan mühüm infrastruktur obyektlərin tikintisi və yenidən qurulmasına, eləcə də vacib ümummili problemlərin həlli üçün istifadə oluna bilər.
2001-2009-cu illərdə əsas diqqət həm neft sektorunun, həm də ölkədəki infrastruktur sahələrin və qeyri-neft sektorunun inkişafına yönəldilib. Hazırda Fondun vəsaitləri hesabına irriqasiya, nəqliyyat sahələrində bir sıra mühüm layihələr maliyyələşdirilir.
Dövlət Neft Fondunun əsas məqsədləri bunlardır: iqtisadiyyata mənfi təsirlərin azaldılması məqsədilə Fondun vəsait və aktivlərini xaricdə yerləşdirməklə müəyyən dərəcədə "holland sindromu"nun qarşısını almaq, vəsaitlərin gələcək nəsillər üçün toplanmasını təmin etmək və ölkədə cari sosial-iqtisadi prosesləri dəstəkləmək.
2011-ci ilin birinci yarısında ARDNF-in aktivləri 7,6 milyard dollardan 30,4 milyard dollaradək artıb.
2011-ci ilin yanvarın 1-nə olan vəziyyətə görə, ARDNF-in aktivləri 22,8 milyard dollar təşkil edib.
