Azərbaycan, Bakı, 21 iyul /Trend/
2011-ci ildə ARDNŞ-nin (Azərbaycan Respublikası Dövlət Neft Şirkəti) Türkiyənin "Petkim" neft-kimya kompleksinə investisiyalarının həcmi 100 milyon dollar təşkil edəcək. Trend-in məlumatına görə, bu barədə ARDNŞ-nin İnvestisiyalar İdarəsinin rəhbəri Vaqif Əliyev Bakıda türkiyəli jurnalistlərə bildirib.
Petkim-də istehsal və satış həcmlərinin artırılması məqsədilə iri konteyner terminalının, habelə müəssisənin elektrik enerjisinə olan tələbatını tam ödəməyə imkan verəcək külək enerjisinin reqenerasiyası üzrə yeni sistemli elketrik stansiyasının tikintisi planlaşdırılıb.
ARDNŞ-nin yaydığı məlumatda deyildiyi kimi, Əliyev onu da bildirib ki, hazırda Türkiyədə "Petkim"in istehsalat meydanında yerləşəcək neft emalı zavodunun tikintisi çərçivəsində işlər davam etdirilir.
Zavodun tikintisi neft-kimya kompleksinin xammala olan tələbatını, eləcə də hazır məhsulun Türkiyə bazarında satışını təmin etməyə imkan verəcək.
2008-ci ildə "SOCAR/Turcas Petrol/Injaz Projects" şirkətlər alyansı Türkiyənin "Petkim" neft-kimya holdinqində 51 faizlik səhm paketinin alınması üçün elan edilən tenderin qalibi olub. Buna görə alyansa 2,04 milyard dollar təklif edilib. Hazırda Türkiyə zəruri kimya məhsullarının 70-75 faizini idxal edir. "SOCAR/Turcas/Injaz"ın "Petkim"in inkişafına yatıracağı sərmayələr məhsul idxalını 30 faizədək azaltmağa imkan verəcək.
"Petkim Petrokimya Holdinq" plastik qablaşdırmalar, parçalar, PVC, yuyucu vasitələr istehsal edir və Türkiyədə bu məhsulların yeganə istehsalçısıdır. Şirkət məhsullarının ¼-ni ixrac edir.