Azərbaycan, Bakı, 25 iyul /Trend, müxbir E.İsmayılov/
ARDNŞ (Azərbaycan Respublikası Dövlət Neft Şirkəti) Xəzərin Azərbaycan sektorundakı "8 Mart" yatağında yeni istismar quyusunun mənimsənilməsinə başlayıb. Bu barədə bazar ertəsi Xəzərdəki mənbə məlumat verib.
Onun sözlərinə görə, qazma işləri başa çatdıqdan sonra quyunun perforasiyası üzrə işlər görülüb.
"Quyunun mənimsənilməsinə başlanılıb. Perforasiya işləri liə quyunun məhsuldarlığını müəyyən etmək mümkün olacaq", - mənbə qeyd edib.
Neftçilər quyunun sutkalıq debitinin 350 min kubmetrə yaxın qaz və 40 ton kondensat təşkil edəcəyini gözləyirlər.
"Hazırda "8 Mart" yatağından sutkalıq 400 min kubmetrdən artıq qaz hasil edilir. Geoloqlar artıq 9 qazma nöqtəsi müəyyən ediblər", - ARDNŞ-nin məlumatında deyilir.
ARDNŞ-nin balansında olan yataqlarda yeni quyuların qazılması hasilatın səviyyəsinin saxlanması məqsədilə aparılır.
