Azərbaycan, Bakı, 1 sentyabr /Trend, müxbir A.Axundov/
Xəzərin Azərbaycan sektorunda külək enerjisi potensialının öyrənilməsi üzrə işlər gələn il başa çatacaq. Trend-in məlumatına görə, bu barədə cümə axşamı jurnalistlərə Azərbaycanın Sənaye və Energetika Nazirliyinin İnvestisiyar və sənaye obyektlərinin yenidən qurulması şöbəsinin müdiri Ramiz Rzayev bildirib.
"Xəzər dənizinin Azərbaycan hissəsində külək enerjisi potensialının öyrənilməsi" layihəsi çərçivəsində ilkin hesabat bu gün INOGATE proqramı çərçivəsində təqdim olunub. Layihəyə həm yerli, həm də xarfici ekspertlər cəlb olunub. Hesabatın təqdimatında Milli Elmlər Akademiyasının, İqtisadi İnkişaf, Ekologiya və Təbii Sərvətlər nazirliklərinin, ARDNŞ-nin nümayəndələri, xarici ekspertlər və başqaları iştirak ediblər. Rzayevin sözlərinə görə, bu, ilkin hesabatdır və üzərində görüləsi işlər hələ çoxdur.
"Layihə çərçivəsində Xəzər dənizinin Azərbaycan akvatoriyasında külək parklarının quraşdırılması planında müxtəlif sahələrin yaradılmasının əlverişliliyi məsələsi öyrəniləcək. Bu qurğuların hündürlüyü və gücünə dair hesabatlar və tövsiyələr, eləcə də belə parkların quraşdırılmasının iqtisadi əsaslılığı təqdim olunacaq", - o deyib.
Rzayevin sözlərinə görə, Avropa Komissiyasının maliyyələşdirdiyi layihə gələn il başa çatacaq və bundan sonra dənizdə külək elektrik stansiyalarının quraşdırılması mümkün olacaq.
