Azərbaycan, Bakı, 13 may /Trend, müxbir E.İsmayılov/
Trans-Anadolu (TANAP) və Trans-Adriatik (TAP) qaz kəmərləri layihələri aşağı riskli layihələr sırasına daxildir. Trend-in məlumatına görə, bu barədə Azərbaycan Respublikası Dövlət Neft Şirkətinin (ARDNŞ) prezidenti Rövnəq Abdullayev "The Business Year" jurnalına müsahibəsində deyib.
R.Abdullayev qeyd edib: "Potensial risk və problemlərdən xəbərdar olduğumuza görə risklərin üzə çıxarılması və onların idarə edilməsi üzrə səmərəli strategiyanın reallaşdırılması məqsədilə tərəfdaşlarımızla daim birgə çalışırıq".
Onun sözlərinə görə, bütün bunlara baxmayaraq, potensial risklər qismində poladın qiymətinin artması ehtimalı, tikinti mərhələsində materialların tədarükü prosesinin pozulmasının mümkünlüyü nəzərdən keçirilir ki, bu da layihələrin vaxtında realllaşdırılmasına təsir edə bilər.
R.Abdullayev bildirib ki, məhz buna görə də mümkün risklərin qarşısını almaq üçün müvafiq tədbirlər görülür: "Tədbirlər yüksək ixtisaslı və təcrübəli menecerlər komandası ilə məhdudlaşmır, həmçinin nəzərdə tutulan qrafikdən kənara çıxmanı minimuma endirmək üçün üçüncü tərəflər cəlb edilir".
