Neft müqavilələri üzrə mənfəətin 2006-cı ildən başlayaraq nəzərdə tutulan bölüşdürülməsi Azərbaycanın 30%, podraçtıların isə 70% payı üzrə nisbətə əsaslanaraq həyata keçiriləcək.
Bu barədə Trend ə Maliyyə Nazirliyindən məlumat verilib. "Əsrin müqaviləsi"nə əsasən, belə nisbət podratçı şirkətlərin 16,75%-dən çox olmayan gəlirlilik göstəricisində saxlanılır. Əgər gəlirlilik göstəriciləri 16,75%-dən 22,75%-dək və 22,75%-dən 80%-dək həddə olarsa, Azərbaycanın payı 55%-dək arta bilər. Bu göstəricilərə əsaslanaraq, Azərbaycan Beynəlxalq Əməliyyat şirkəti ("Azəri-Çıraq-Günəşli" yatağının işlənib hazırlanması üzrə operator) 2006-cı ilin dövlət büdcəsinə təxminən 200 mln AZN mənfəət vergisi ödəyəcək. Bu hesablamalar dövlət büdcəsində nəzərdə tutulmuş neftin qiyməti (1 barel neft - 40 dollar) əsasında aparılıb. Ancaq qiymətlərin davamlı şəkildə artması və proqnozu bir qədər keçməsi ilə əlaqədar, ABƏŞ nisbətən çox mənfəət vergisi ödəyəcək.
Maliyyə Nazirliyi aprelin 15-dək ABƏŞ-ə təqdim olunacaq gəlirlərə dair bəyannamə əsasında daha dəqiq hesablamalar apara bilər. AÇG yatağının işlənib-hazırlanması haqqında müqaviləyə əsasən, ABƏŞ mənfəət vergisinin ödənilməsinə yalnız öz xərclərinin yerini doldurduqdan sonra başlayacaq.
ABƏŞ vergini müqavilədə nəzərdə tutulmuş 25%-lə ödəyəcək. Ötən il ABƏŞ mənfəət vergisi ödəməyib, ancaq onun tərkibinə daxil olan şirkətlər gəlir, subpodratçılar isə mənfəət vergisi ödəyib.