Azərbaycan Dövlət Neft Şirkətinin (ARDNŞ) neft-qaz əməliyyatlarını dəstəkləyən "Xəzər dəniz neft donanma" İdarəsi müxtəlif tipli 10 yeni gəminin inşası üzrə texniki tapşırıq hazırlayıb. Bu barədə Trend ə ARDNŞ-dən xəbər verilib. Bundan başqa, gəmilərin inşası ilə məşğul olan zavodlarla danışıqlar aparılıb və müvafiq təkliflər alınıb. Hazırda təkliflər gözdən keçirilir. ARDNŞ-i qane edən variant seçildikdən sonra son danışıqlar aparılacaq.
Bu proses "2005-2015-ci illər üçün Azərbaycanın yanacaq-energetika kompleksinin inkişafı" Dövlət proqramının gerçəkləşdirilməsi çərçivəsində həyata keçirilir.
Bundan başqa, ARDNŞ dəniz neft-qaz əməliyyatlarının dəstəklənməsində istifadə olunan "Qurban Abbasov" kran gəmisinin təmiri və müasirləşdirilməsi üzrə işlərə başlayıb. Bu gəmi 600 ton yük qaldırmaq iqtidarındadır. Gəmi 14 il bundan əvvəl təmirə qoyulub. Lakin birbaşa işlər yalnız bu il başlanıb.
Hazırda istehsalat müəssisəsi 186 gəmidən istifadə edir. Onlardan 20-si "Azəri"-"Çıraq"-"Günəşli" yataqlarının işlənmə layihələri çərçivəsində fəaliyyət göstərir.
