Koreya şirkətləri Azərbaycanın "Ümid-Babək" kimi yataqlarının işlənməsində, eləcə də "Əşrəfi" və "Qarabağ" perspektiv strukturların kəşfiyyat prosesində iştirak edə bilərdi. Trend xəbər verir ki, bu barədə bu gün Azərbaycanın Sənaye və Energetika Nazirliyinin investisiya siyasəti və sənaye müəssisələrinin yenidən qurulması şöbəsinin başçısı Ramiz Rzayev bildirib.
Bundan başqa, Koreya şirkətləri ölkənin işlənilən yatağında neft hasilatının artırılması layihələrində, qaz infrastrukturunun, elektrik stansiyalarının, yarımstansiyaların, paylayıcı şəbəkələrin tikintisində, neft emalı zavodlarının müasirləşdirilməsində iştirak edə bilər.
Koreya tərəfini maraqlandıra biləcək energetika sahələrindən biri bərpa olunan enerji mənbələri ola bilər.
R.Rzayevin sözlərinə görə, hazırda Azərbaycanın su elektrik stansiyaları ilə elektrik enerjisinin hasilat potensialı ildə təxminən 40 mlrd. kVt/saat təşkil edir. Təxminən 100 su elektrik stansiyasının yaradılma layihəsi hazırlanır.
Bundan əlavə, Azərbaycanda ildə 2700-3000 saat ərzində 5m/s-dən 20-ə m/s-ə qədər külək müşahidə olunur. Enerjinin bu növünün hasilatının potensial gücü ildə təxminən 800 Mvt- 4 mlrd. kVt/s təşkil edir. Azərbaycan həmçinin günəşli günlərin sayına görə bir çox ölkələri geridə qoyur və isti bulaqlar, biokütlə kimi mümkün elektrik enerjisi mənbələrinə malikdir.
