İran tərəfi Naxçıvan Muxtar Respublikasının (NMR) Ordubad rayonunda, Araz çayı üzərində sərhədyanı su elektrik stansiyasının (SES) inşası ilə bağlı Azərbaycanın sorğusuna dair danışıqları davam etdirmək niyyətindədir. Bu barədə Trend ə "Azərenerji" səhmdar cəmiyyətinin vitse-prezidenti Marlen Əsgərov məlumat verib.
Danışıqları NMR-in Energetika üzrə Dövlət Agentliyinin təmsilçiləri aparacaqlar, lakin "Azərenerji"nin məsləhətçiləri də danışıqlara qoşulacaq.
"Azərenerji" səhmdar cəmiyyəti 36 MVt gücündə yeni elektrik stansiyasını inşa etmək niyyətindədir.
İran tərəfi ilə razılaşma zəruridir, belə ki, çay sərhəddən keçir. İranlı energetiklərə layihənin texniki-iqtisadi əsaslandırılması təqdim olunub.
Layihənin dəyəri bütün layihə sənədləri hazırlandıqdan sonra dəqiqləşdiriləcək.
