"2007-ci ildə Azərbaycan Dövlət Neft Şirkəti (ARDNŞ) qaz hasilatını 500 mln. m3 artıracaq. Dövlət başçısı daxili potensialın tam istifadə olunması ilə bağlı göstəriş verib və ARDNŞ bunun üzərində işləyir. 2006-cı ildə həmçinin keçən ilə nisbətən 500 mln. kubmetr çox qaz hasil olunacaq", - deyə bu gün Azərbaycanın sənaye və energetika naziri Natiq Əliyev jurnalistlərə bildirib. Bu barədə Trend xəbər verir.
"Biz qaz hasilatımızı artırmaq üçün bütün imkanlarımızdan istifadə edəcəyik. Daxili potensial hesabına 2007-ci ildən başlayaraq qaz hasilatını 2 mlrd. kubmetr artırmağa imkan verəcək proqramımız var", - deyə nazir qeyd edib.
Bununla yanaşı, N. Əliyev bildirib ki, yeni yataqların işlənilməsi üçün kəşfiyyat əməliyyatları davam etdirilir, yeni imkanlardan istifadə olunur. Respublikada istehlak olunan ikinci qaz mənbəyi "Azəri"- "Çiraq"-"Günəşli" (AÇG) yataqlarıdır. Gələn il bu yataqlardan 5 mlrd. kubmetrdən çox qaz hasil olunacaq.
Gələn il bu həcmdən 1,4 mlrd. kubmetr səmt qazının Azərbaycana verilməsi nəzərdə tutulur. Hazırda "AÇG"də laylara vurulan həcmin azaldılması hesabına Azərbaycana veriləcək səmt qazının həcminin artırılması üçün nazirlik ARDNŞ ilə birgə həmin məsələ üzərində işləyir.
