"Azəri-Çiraq-Günəşli" yataqlarının geniş miqyaslı işlənilməsi layihəsinin operatoru - BP layihə üzrə tərəfdaşları adından bu gün "Lay sularının idarə edilməsi və ləğvi" çərçivəsində ətraf mühitə və sosial-iqtisadi sahəyə təsirin qiymətləndirilməsi ilə bağlı sənədi ictimaiyyətə açıqlayıb. Trend in xəbər verdiyi kimi, bu sənədin müzakirəsində qeyri-hökumət təşkilatlarının nümayəndələri, ekoloqlar və başqaları iştirak ediblər.
Adıçəkilən layihənin gerçəkləşdirilməsi uzun müddət üçün ətraf mühitin qorunması və sosial-iqtisadi sahə üçün yaxşı həldir. Sənəd görülən işlərin ətraf mühitə və sosial-iqtisadi sahəyə potensial təsirini və təsirin azaldılması ilə bağlı tədbirləri özündə əks etdirir.
Neft hasil edilərkən orada su əmələ gəlir və bu su kənarlaşdırılmalıdır. Tərkibində olan az miqdarda üzvü maddə və çox duzluluq üzündən bu su problemlər yarada bilər. Səngəçal neft terminalına göndərilmədən əvvəl "AÇG" çərçivəsində obyektlərdə neftdən ayrılan suyun 95 %-i yenidən laylara vurulacaq. Suyun qalan 5 %-i isə Səngəçal neft terminalında ayrılacaq. Terminalda ayrılacaq su üçün "Lay sularının idarə edilməsi və ləğvi" layihəsinin gerçəkləşdirilməsi nəzərdə tutulub. Həmin layihə bu məsələni uzun müddətə həll etməyə imkan verəcək.
Bu layihə çərçivəsində "Mərkəzi Azəri"də suyun və qazın vurulması üçün platformaya qədər sualtı boru kəmərinin inşası nəzərdə tutulub. Bu boru kəməri ilə su yatağa çatdırılacaq və dənizdə ayrılmış su ilə birgə laylara vurulacaq.
