"Azəri"- "Çıraq"- "Günəşli" (AÇG) dəniz blokunu mənimsəyən Azərbaycan Beynəlxalq Əməliyyat Şirkəti (ABƏŞ) 2007-ci ilin yanvarında müxtəlif istiqamətlərdə 2,203 mln. ton Azeri Light növlü neft ixrac edib, bu isə ötən ilin analoji dövründən 911 min ton çoxdur.
ABƏŞ-dən Trend ə verilən məlumata görə, yanvar ayında boru kəmərində təmir işləri aparıldığından Bakı-Supsa boru kəməri ilə ("qərb" marşrutu) neft ixrac olunmayıb. 2006-cı ilin yanvar ayında bu marşrutla 599 min ton Azeri Light nefti ixrac olunub.
Bakı-Novorossiysk boru kəməri ilə ("şimal" marşrutu) 2007-ci ilin yanvar ayında 314,057 min ton neft (4 tanker) ixrac olunub, 2006-cı ilin yanvar ayında isə bu göstərici 339,7 min ton təşkil edib.
Gürcüstanın Batumi limanı istiqamətində (ABƏŞ-in tərkibinə daxil olan ExxonMobil və Devon şirkətləri istisna olmaqla) 2007-ci ilin yanvar ayında 271 min ton neft (4 tanker) göndərilib, 2006-cı ilin yanvar ayında bu, 354 min ton olub.
Bakı-Tbilisi-Ceyhan (BTC) boru kəməri ilə 2007-ci ilin yanvarında 1 mln. 618,6 min ton neft (15 tanker) ixrac olunub. Bu istiqamətdə neft ixracı 2006-cı ilin iyun ayında başlayıb.
