Azərbaycan, Bakı/ Trend müxbir İ.Xəlilov/ BP-nin göstəricilərinə görə, Bakı-Supsa marşrutunda olan texniki nasazlıqlar ən azı 2007-ci ilin ortalarına qədər neft ixracına yenidən başlamağa imkan verməyəcək. Bu barədə məlumatı cümə axşamı Dövlət Neft Şirkətinin yüksək vəzifəli təmsilçisi verib.
"ARDNŞ-ı 2007-ci ilin qalan dövrü ərzində kəmərlə ixrac oluna biləcək neftin həcmi maraqlandırır. Ancaq biz konkret məlumat ala bilmirik. Bu məsələ kəmərin nə zaman fəaliyyətə başlayacağı ilə əlaqədardır",-deyə bildirilib.
Onun sözlərinə görə, Bakı-Supsa kəmərinin Gürcüstan hissəsində texniki problemlər var. Həmçinin kəmərin işinə təhlükə ola biləcək sürüşmələr də mövcuddur.
"Buna görə də operatorun (BP) imkanları hesabına nasazlıqların aradan qaldırılması perspektivləri və formaları müəyyənləşdirilir",-deyə o bildirib.
Hazırda "Azəri-Çıraq-Günəşli" yatağınadan çıxarılan neft BTC, Bakı-Novorossiysk kəmərləri və dəmir yolu ilə Poti limanına ixrac olunur.