Azərbaycan, Bakı/ Trend / "McDermott" şirkəti Azərbaycan Dövlət Neft Şirkətilə bağlanmış müqaviləyə əsasən, "Günəşli" yatağında 20 düymlük 2 sualtı qaz kəmərinin çəkilişini başa çatdırıb. Bu barədə ARDNŞ-dən məlumat veriblər.
Tikintinin sifarişçisi kimi "28 May" neft və qaz çıxarma idarəsi, podratçısı isə "Neftqaztikinti" tresti çıxış edib.
26 km uzunluğunda olan birinci kəmər yüksək təzyiqli qazın "Günəşli- 14" platformasından "Neft Daşları"ndakı qazpaylayıcı məntəqəyə nəql edilməsi üçün nəzərdə tutulub. 20 km uzunluğu olan ikinci kəmər isə "Günəşli- 4" platformasından aşağı təzyiqli qazın "Neft Daşları"ndakı 2 №-li sıxıcı kompressor stansiyasına ötürülməsi üçün layihələndirilib.
Hər iki kəmər eyni texniki parametrlərə malikdir. Kəmərlərin inşa edildiyi sahədə dənizin maksimal dərinliyi 123 metr, minimal dərinliyi isə 11 metrdir. Ümumi uzunluğu 52 km olan borular Almaniyanın "Mannesmann" şirkəti tərəfindən istehsal edilib. İnşa işlərində "İsrafil Hüseynov" borudüzən gəmisindən istifadə edilib. Gəmi fasiləsiz işləməklə sutkada 2- 3 km boru çəkib. Bütün işlər 3 ay ərzində başa çatdırılıb.
Artıq yüksək təzyiqli qaz kəməri istismara buraxılıb. Layihə üzrə kəmər 80 atmosfer gücündə nəzərdə tutulsa da, xüsusi qatqılarla birlikdə dəniz suyu ilə doldurularaq 100 atmosfer üzrə yoxlamadan keçib. Aşağı təzyiqli qaz kəmərində isə son presləmə və sınaq işləri aparılır. Yaxın bir həftə ərzində həmin kəmər istismara veriləcək.