Azərbaycan, Bakı/ Trend müxbir S.Əliyev/ Azərbaycan Dövlət Neft Şirkəti (ARDNŞ) "Naxçıvan" perspektiv strukturunda olan kəşfiyyat quyusunu tamamilə öz hesabına maliyyələşdirməkdən imtina edib.
"Bu onunla izah olunur ki, qazma işlərində istifadə olunması güman edilən "Heydər Əliyev adına" qazma qurğusuna görə yüksək məbləğ istənilib",-deyə ARDNŞ-dən bildirilib.
ARDNŞ nümayəndəsinin sözlərinə görə, bu strukturda işlərin başlanılmasını hər hansı bir şirkətlə iş üzrə risklərin bölünməsini əks etdirən saziş imzalandıqdan sonraya gözləmək olar.
Bununla yanaşı, ARDNŞ nümayəndəsi bildirib ki, əgər "İstiqlal"qazma qurğusunun sahibi SP CDC bu işlərin görülməsi üçün vaxt tapa bilərsə, bu qurğudan istifadə oluna bilər. Hazırda "İstiqlal" qazama qurğusundan BP-nin sifarişi əsasında "Şahdəniz" qaz-kondensat yatağında istifadə olunur. İlin sonunda isə qurğudan BP-nin sifarişi ilə "İnam" strukturunda istifadə olunacaq.
ARDNŞ hazırda "Naxçıvan" strukturunda kəşfiyyat quyusu qazılması proqramında dəqiqləşdirmə prosesi aparır. "Naxçıvan" strukturunda kəşfiyyat quyusunun qazılmasının təqribi dərinliyi 6 200 metr hesab olunur.
Neft Şirkətinin "Naxçıvan" strukturunda daha öncə ExxonMobile şirkəti tərəfindən qazılmış bir quyusu var. Sonradan ExxonMobile bu strukturda iqtisadi cəlbediciliyin olmadığını müəyyən edərək işlərin davam etdirilməsindən imtina edib.
"Naxçıvan" strukturunun işlənilməsi barədə saziş 1 avqust 1997-ci ildə imzalanıb.
Layihənin iştirakçıları ExxonMobile - 50 faiz, ARDNŞ - 50 faiz idi.
