Azərbaycan, Bakı /müx. Trend S.Əliyev/ Azərbaycanın "Azəri" yatağının işlənilməsi layihəsi üzrə tikinti işlərinə 2007-ci ilin 5 ayında $45 mln. xərclənib. Bu barədə cümə günü brifinqdə BP-nin "Azəri-Çıraq-Günəşli" yatağı layihəsi çərçivəsində tikinti üzrə vitse-prezidenti Bryus Lyuberski məlumat verib. Ümumilikdə "Azəri" layihəsi üzrə tikinti işlərinə bu günədək $6,53 mlrd. sərf olunub.
"Azəri" yatağı "Azəri-Çıraq-Günəşli" müqavilə sahəsinin tərkibinə daxildir. Operator rolunda BP çıxış edir.
Lyuberskinin sözlərinə görə, "Günəşli" yatağının dərinlikdəki hissəsinin işlənilməsi layihəsi çərçivəsində 2007-ci ilin beş ayında tikinti işlərinə $475 mln. xərclənib. Ümumilikdə "Günəşli" yatağının dərinlikdəki hissəsinin işlənilməsi layihəsi üzrə tikinti işlərinə bu günədək $2,53 mlrd. vəsait sərf olunub.
Ümumiyyətlə "Azəri" və "Mərhələ-3" layihələri, plast sularının utilizasiyası və "Günəşli" yatağının dərinlikdəki hissəsinin cənub manifoldunun inşasına $9,35 mlrd. xərclənib.
