Azərbaycan, Bakı/ Trend müxbir S.Əliyev/ Hazırda Azərbaycanın "Şahdəniz" yatağında sutkalıq qaz hasilatı 8,5 mln. kubmetr təşkil edir.
Bu həcmdən 5,5 mln. kubmetrini Azərbaycan, 1 mln. kubmetrini Gürcüstan, 200-700 min kubmetrini Türkiyə alır. Qalan həcm isə yanacaq kimi Bakı-Tiflis-Ceyhan əsas ixrac kəmərinin nasos stansiyasına verilir. Bu barədə cümə günü hökumətdən məlumat verilib.
Proqnozlara əsasən, Azərbaycan ilin sonuna qədər "Şahdəniz" yatağından təqribən 1 mlrd. 200 mln. kubmetr qaz alacaq.
BP Azərbaycan "Şahdəniz" yatağından qaz hasilatını tədricən artırmaq niyyətindədir.
Yataqdan qaz hasilatının artırılması Türkiyə tərəfinin qazı qəbul etməyə başlaması ilə əlaqədardır. Hazırda yataqda üç quyu fəaliyyət göstərir. Oktyabrda dördüncü quyunun istismara buraxılması planlaşdırılır. Daha sonra bu il platformada yeni quyunun qazılması planlaşdırılır.
Mərhələ -1 çərçivəsində yataqda stabil hasilat ildə 8,6 mlrd. kubmetr qaz və təqribən sutkada 30 min barel kondensat təşkil edəcək.
