Bakı.Trend:
Asiya İnkişaf Bankı (AİB) 2026–2027-ci illər üçün “İnklüziv və “Yaşıl” artım naminə ticarətin inkişafına yardım” altproqramını təsdiqləyib.
Trend banka istinadən xəbər verir ki, proqrama iştirakçı ölkələrin geniş dairəsi ilə yanaşı Azərbaycan da daxildir.
Regional təşəbbüs Asiya və Sakit okean regionunun iqtisadiyyatlarını, o cümlədən Əfqanıstan, Ermənistan, Banqladeş, Çin, Hindistan, İndoneziya, Qazaxıstan, Qırğızıstan, Pakistan, Türkiyə, Özbəkistan, Vyetnam və digər ölkələri əhatə edir.
Proqramın maliyyələşdirilməsinə Texniki Yardım üzrə Xüsusi Fondun 112,5 min ABŞ dolları həcmində töhfəsi, həmçinin Avstraliya hökumətinin 146 866,94 ABŞ dolları məbləğində dəstəyi daxildir.
Bu altproqram AİB-ə Ümumdünya Ticarət Təşkilatı himayəsi altında keçirilən qlobal icmal çərçivəsində öhdəliklərin icrasını davam etdirməyə, o cümlədən “Aid for Trade in Asia and the Pacific 2026” hesabatını hazırlamağa imkan verəcək. Təşəbbüs çərçivəsində bilik mübadiləsi tədbirləri, o cümlədən hesabatın qlobal icmalda təqdimatı, həmçinin işçi sənədlər, siyasi icmallar, bloqlar və məlumatların təhlili alətləri formasında analitik materialların dərc olunması da nəzərdə tutulur.
Təşəbbüs inkişaf etməkdə olan iqtisadiyyatların ticarət səmərəliliyinin artırılması və onların qlobal ticarət sistemində iştirakının gücləndirilməsi məqsədilə resursların səfərbər edilməsinə yönəlib.
