Bakı. Trend:
Biz iqlim maliyyəsini bütün mənbələrdən genişləndirməyə çalışırıq.
Trend xəbər verir ki, bu barədə COP29-un müəyyən edilmiş Prezidenti, Azərbaycan Respublikası ekologiya və təbii sərvətlər naziri Muxtar Babayev Bakıda BMT-nin İqlim Dəyişmələri üzrə Tərəflərin İlkin Konfransı (Pre-COP29) çərçivəsində keçirilən panel iclası zamanı deyib.
Nazir qeyd edib ki, biz iqlim maliyyəsinin əlçatanlığını əhəmiyyətli dərəcədə artırmalıyıq.
“Yaşıl İqlim Fonduna və iqlim maliyyəsininə töhfələrin artırılmasını tələb etməyə davam edirik, lakin biz qəbul edirik ki, iqlim maliyyəsi üçün bütün maliyyə vəsaitləri dövlət sektorundan gələ bilməz. İqlim maliyyələşdirilməsinin yalnız 2%-i hazırda özəl sektordan gəlir. Çoxtərəfli inkişaf bankları və beynəlxalq maliyyə institutları özəl sektor investisiyalarının cəlb edilməsində rol oynamalıdırlar. Biz iqlim maliyyələşdirməsinə miqyası, effektivliyi və asan çıxışını artırmaq üçün bu təşkilatlarla işləyirik”,- deyə nazir əlavə edib.
Qeyd edək ki, Bakıda Pre-COP29 tədbirinin ikinci günü keçirilir.
Tədbirin ikinci günü çərçivəsində plenar sessiyalar və paralel tədbirlər keçirilməsi nəzərdə tutulub.