Azərbaycan, Bakı, 17 iyul/ Trend , müxbir S.Babayeva/ Hindistan şirkətləri informasiya-kommunikasiya texnologiyaları sahəsinə sərmayə yatırmaqda maraqlıdırlar, - Azərbaycanın Hindistandakı səfiri Tamerlan Qarayev Azərbaycanın rabitə və informasiya texnologiyaları naziri Əli Abbasovla görüşündə bildirib, - nazirliyin mətbuat xidməti xəbər verir.
Onun sözlərinə görə, Hindistan şirkətləri üçün xüsusi maraq Azərbaycanda regional innovasiya zonasının (RİZ) yaradılması və burada Banqalor (Bangalore) - Hindistandakı böyük texniki parkın təcrübəsinin tətbiqi kəsb edir.
Səfir bildirib ki, ilin sonunadək Hindistan şirkətlərindən biri Azərbaycan tərəfinə RİZ layihəsində iştirakla bağlı təkliflər paketini təqdim edəcək. Şirkətin adı göstərilmir.
RİZ layihəsi kiçik və böyük innovasiya sahibkarlığının inkişafı üçün texniki parkların, elektrik avadanlıqları və proqram məhsullarının istehsalı və ixracı üzrə regional bazanın yaradılmasını, ölkənin sərfəli tranzit informasiya mərkəzinə (Data Centre) çevrilməsini, formalaşan informasiyalı cəmiyyət üçün insan resurslarının hazırlanmasını və inkişafını, müxtəlif sahələrdə informasiya texnologiyalarının tətbiqini nəzərdə tutur.
Azərbaycanın Rabitə Nazirliyində hesab edirlər ki, Azərbaycanda RİZ layihəsinin həyata keçirilməsinə potensial sərmayədarların cəlb edilməsi üçün vergi və gömrük güzəştləri müəyyən ediləcək.
Hazırda nazirliyin mütəxəssislərinin xarici ekspertlərlə birgə işləyib hazırladıqları RİZ layihəsi üzrə ümumi təkliflər paketi hökumətdə nəzərdən keçirilir.
Nazirlikdə hesab edirlər ki, yeni layihə 2012-ci ildə ölkədə rabitə sahəsinin gəlirlərini $4 milyardadək artırmağa imkan verəcək. 2018-2020-ci illərdə bu rəqəm neft gəlirlərinə çata bilər və $10-12 milyard olmaqla, gələcəkdə artmaqda davam edə bilər.
