Azərbaycan, Bakı, 29 oktyabr/ Trend , müxbir Ü.İsmayılova/ "Azərbaycanda mobil nömrənin daşınması sistemi tətbiq edilə bilər", - rabitə və informasiya texnologiyaları nazirinin müavini İltimas Məmmədov çərşənbə günü Qarşılıqlı Rouminq Ekspertləri Qrupunun (QREQ) illik iclasında bildirib.
"Bu sistemin tətbiqi abunəçilərin mobil operatordan asılılığını azaltmağa imkan verəcək", - nazir müavini bildirib.
Məmmədovun sözlərinə görə, bir mobil rabitə operatorunun istifadəçisi təqdim edilən xidmət və ya tarifləri bəyənməzsə, o zaman nə telefon nömrəsi, nə də nömrənin yığım kodunu dəyişmədən, daha yaxşı hesab etdiyi digər operatora keçə bilər.
Dünyanın əksər ölkələrində təcrübədən keçirilən belə sistemin əsas məqsədi müştərinin qorunmasıdır. Azərbaycan qərar qəbul edildiyi gündən yaxın üç ay ərzində belə sistemi tətbiq etmək imkanına malikdir.
"Rabitə Nazirliyi bu istiqamətdə iş aparmağa başlayıb və artıq istehsalçı şirkətlə (proqram təminatı) ilk layihə imzalanıb. Bu sistemin tətbiqinə onun yerli qanunvericiliyə uyğun vəziyyətə gətirilməsindən dərhal sonra başlanılacaq", - nazir müavini bildirib.
Müəlliflə əlaqə saxlamaq üçün elektron ünvan: [email protected]