Azərbaycan, Bakı, 04 iyun / Trend , müxbir S.Babayeva /
Rabitə sahəsində Regional Birlik (RRB) Avrasiya transmilli superinformasiya "Şərq-Qərb" magistralının salınması üzrə layihəni dəstəkləyir. Bu barədə cümə axşamı Azərbaycanın Rabitə və İnformasiya Texnologiyaları Nazirliyi bildirib.
"Nümayəndələrimizin də (Rabitə Nazirliyi) magistralın salınması layihəsi üzrə təqdimatla çıxış etdikləri RRB rabitə administrasiyası başçılarının görüşü çərçivəsində təşkilat öz mütəxəssisini layihənin işçi qrupuna daxil etmək barədə qərar qəbul edib", - deyə nazirlikdən bildirilib.
Azərbaycan Respublikası Rabitə Nazirliyi bu layihənin həyata keçirilməsi üçün 40 ölkədən dəstək almaq, eyni zamanda onu ölkədə yerləşən 40 səfirliklə müzakirə etmək niyyətindədir. Bundan sonra layihənin BMT-nin iclasına çıxarılacağı planlaşdırılır.
Layihənin məqsədi elektron informasiya şəbəkəsinin və elektron bazarının inkişafı üçün ucuz və keyfiyyətli internet xidmətlərindən və genişmiqyaslı xidmətlərdən yararlanmaq üçün güclü informasiya infrastrukturunun yaradılmasıdır.
Rabitə Nazirliyində hesab edirlər ki, layihənin reallaşması iştirakçı ölkələrə təkcə informasiya texnologiyalarının deyil, eyni zamanda sosial sektorun və iqtisadiyyatın digər istiqamətlərinin də inkişafına şərait yaradacaq.
Ekspertlər hesab edir ki, layihənin reallaşması üçün ilk növbədə vahid idarəetmə strukturu yaradılmalıdır, maraqlanan bütün dövlətlər tariflərin nizamlanması üzrə şəbəkənin yaradılması istiqamətində vahid strategiyanın işlənib hazırlanmasında iştirak etməlidirlər.
Layihənin dəyəri hələ ki, müəyyənləşdirilməyib. Layihənin təşəbbüskarı Azərbaycan Höküməti və ABŞ-ın Ticarət və İnkişaf Departamentidir.
Məqalə müəllifi ilə əlaqə ünvanı: [email protected]
