Azərbaycan, Bakı, 31 iyul / Trend , müxbir H. Vəliyev /
2009-cu il avqustun 8-15-də Bolqarıstanın Plovdiv şəhərində məktəblilər arasında informatika üzrə XXI olimpiya oyunları keçiriləcək. Tədbirlərə Rabitə və İnformasiya Texnologiyaları Nazirliyi, Təhsil Nazirliyi, eləcə də Azerfon MMC-nin dəstəyi ilə informatika üzrə Azərbaycan milli komandası da qatılacaq.
İnformatika üzrə tanınmış pedoqoq Ramin Mahmudzadənin hazırlaşdırdığı milli komanda informatika və proqramlaşdırma ilə maraqlanan ən istedadlı Azərbaycan məktəblilərindən ibarətdir.
Bu gün Azerfon MMC-nin baş direktoru Qido Helbixlə milli olimpiya komandasının üzvlərinin görüşü keçirilib. Görüş zamanı Helbix Azerfon şirkətinin peşəkar kadrların dəstəyi ilə informasiya texnologiyaları sahəsində rolundan və Azərbaycanda İKT sektorunun inkişafından danışıb.
"Bu gün İKT Azərbaycanda prioritet sektor elan edilib. Sözügedən sektorun savadlı inkişafının təmin olunması üçün ölkəyə yüksək ixtisaslı kadrlar lazımdır. Bu sahənin gələcək mütəxəssislərini məktəblilər arasından üzə çıxarmaq, onlarda informasiya texnologiyaları sahəsinə maraq oyatmaq lazımdır. Məktəblilərin belə olimpiadada iştirakı çox vacibdir. Azerfon şirkətinin bu cür tədbirlərə dəstəyini minlərlə azərbaycanlı məktəbli üçün gələcəkdə proqramçı peşəsinin seçimində yüksək stimul hesab etmək olar", - Azərfonun baş direktoru deyib.
Azərbaycan məktəblilər arasında beynəlxalq olimpiadalarda 1994-cü ildən iştirak edir. 1996, 1997, 2004-cü illərdə Azərbaycanın olimpiya komandası bürünc, 2003-cü ildə isə gümüş medal qazanıb.
