Azərbaycan, Bakı, 24 avqust / Trend , müxbir H.Vəliyev /
Mobil rabitə tariflərinin azalması taksafon xidmətlərinə tələbatı aşağı salır. Bu barədə Trend -a "Akhundoff Networks" şirkətindən məlumat verilib.
Şirkətin məlumatına görə, bu, ilk növbədə paytaxtda mobil rabitənin inkişafı ilə əlaqədardır. Hazırda Bakıda və regionlarda "Akhundoff Networks" şirkətinin Simens və VisionTec istehsallı GSM-taksafonları istifadə olunur. Taksafonlar plastik çip kartları ilə işləyir, şəhərlərarası və beynəlxalq telefon rabitəsi xidməti göstərirlər. "Akhundoff Networks" taksafonlarına GSM şəbəkəsində rabitə xidməti "Azercell Telecom" MMC tərəfindən verilir.
"Akhundoff Networks"-dən qeyd edildiyi kimi, bu gün mobil rabitənin yayılma səviyyəsi və dəyərinin azalması taksafon rabitəsinin populyarlığının və gəlirliliyinin azalmasına gətirib çıxarıb. Əhali GSM taksafonlarından çox az istifadə edir. Çünki Azərbaycanda mobil telefon sahiblərinin sayı ildən ilə artır.
Rəsmi statistikaya əsasən, Azərbaycanda mobil rabitə operatorlarının abunəçiləri təxminən 6,9 milyon nəfərdir. Bu da təxminən əhalinin sayının (8,9 milyon nəfər) 77,5 faizidir.
Məqalə müəllifi ilə əlaqə ünvanı: [email protected]
