Azərbaycan, Bakı, 26 avqust / Trend , müxbir Q.Vəliyev /
"Azərbaycanın İnformasiya Texnologiyaları İnstitutu tədqiqat mərkəzi üçün lazım olan texniki avadanlığın quraşdırılması üzrə işlər aparır", - İTİ-nin məlumatında deyilir.
İnstitutun məlumatına görə, hazırda müxtəlif istiqamətli mərkəzlərin fəaliyyətinin genişləndirilməsi məqsədilə tədqiqat mərkəzinin yenidən qurulması işləri aparılır. Elmi-innovasiya mərkəzi üçün meydança ayrılıb və qlobal şəbəkəyə qoşulma üzrə işlər həyata keçirilir.
Bu gün innovasiyalar bütün sahələrdə (təhsil, tibb, sənaye və s.) öz əksini tapır. Yalnız son bir il ərzində Azərbaycan Milli Elmlər Akademiyasının elmi innovasiya mərkəzi tərəfindən 337 elmi-tədqiqat və təcrübə-konstruktor işləri qeydiyyatdan keçirilib.
Hazırda Azərbaycanda elmi-tədqiqat və təcrübə-konstruktor işlərinin ÜDM-ə nisbətən xərcləri cəmi 0,2 faiz təşkil edir. İnkişaf etmiş ölkələrdə bu göstərici 4 faizə çatır.
İnnovasiyaların tətbiqi üçün sərmayələr tələb olunur. İnkişaf etmiş ölkələrdə innovasiyaların inkişafına qoyulan sərmayələrin böyük hissəsi qeyri-dövlət sektorunun müəssisə və şirkətlərinin payına düşür.
Azərbaycanlı iş adamları daha çox hazır məhsulun tətbiqinə yönəlirlər ki, bu da onları bu və ya digər məhsulun açarını özündə saxlamaq hüququna malik olna xarici istehsalçıdan asılı vəziyyətə salır.
Məqalə müəllifi ilə əlaqə ünvanı: [email protected]
