Azərbaycan, Bakı, 28 sentyabr / Trend , müxbir H.Vəliyev/
Azərbaycan, Belarus, Qazaxıstan, Tacikistan, Ukrayna və Özbəkistanın genişlənən bazarlarında yeni texnologiyalardan istifadənin üstünlük təşkil etməsi "Capacity Russia 2009" konfransının əsas müzakirə mövzularından biri olacaq. Konfrans 5-6 oktyabrda Moskvada keçiriləcək. Bu barədə Rabitə və İnformasiya Texnologiyaları Nazirliyi məlumat verir.
Konfransda TTK, Rostelekom, Sinterra, Teliasonera, Vımpelkom və digər şirkət rəhbərlərinin rəsmi məruzə ilə çıxışı gözlənilir.
İP texnologiyasının artmasının vacibliyi, DATA mərkəzlərinin və məlumat ötürülməsi xidmətinin təhlükəsizliyi, mobil operatorların model biznesi, investisiya və biznes tərəfdaşlığı, VoİP-in tənzimlənməsi, mobil trafiki, həmçinin WiMAX, 3G Optik rabitəsi kimi texnologiyaların aktuallığı barədə məruzələr dinləniləcək.
RİTN-in məlumatına görə, RİTN Beynəlxalq Əlaqələrin Hesablanması Mərkəzinin trafik analizi və marketinq şöbəsinin rəisi Hafiz Hacıyev rəsmi məruzə ilə çıxış edəcək.
"Capacity Russia 2009" konfransı iri və nüfuzlu forumdur. Forumda Rusiyanın, Qərbi və Şərqi Avropa ölkələrinin, həmçinin Asiya-Sakit Okean regionunun operator biznesini təmsil edən 200-ə yaxın mütəxəssis iştirak edir.
Məqalə müəllifi ilə əlaqə ünvanı: [email protected]
