Bakı, Azərbaycan, 15 oktyabr / Trend , H.Vəliyev/
Respublikada regional innovasiya zonasının (RİZ) yaradılması IT sənayesinin prioritet inkişaf istiqaməti qismində müəyyənləşdirilib, bu barədə jurnalistlərlə söhbətində Rabitə və İnformasiya Texnologiyaları Nazirliyinin İnformasiya cəmiyyətinin inkişafı şöbəsinin müdiri Rüfət Gülməmmədov bildirib.
Hazırda nazirliyin Azərbaycanda RİZ-in yaradılması üzrə təklifləri hökumət tərəfindən nəzərdən keçirilir. Təkliflər beynəlxalq konsaltinq şirkəti Booz-Allen-Hamilton tərəfindən hazırlanıb.
Gülməmmədovun sözlərinə əsasən, vergilərin, sosial və gömrük rüsumlarının azaldılması, bəzi hallarda hətta tamam ləğv edilməsi vacib məsələlərdən biridir. Bu məsələlərin müsbət həlli Azərbaycana məhsul idxalı üçün, həmçinin gələcəkdə regional bazarlara ixracı ilə ölkə ərazisində xarici investorların istehsal xəttinin təşkili üçün əlverişli şərait yaradacaq.
Nazirliyin proqnozlarına əsasən, layihə uğurla həyata keçirildiyi təqdirdə RİZ-dəki layihələrdən gələn gəlirlərin artımı 2020-ci ilə kimi 12 milyard dollara çatacaq.
Azərbaycanda regional innnovasiya zonası layihəsi kiçik və orta innovasiya sahibkarlığının inkişafı üçün texnoparkların yaradılmasını, elektrik avadanlıqlarının və proqram təchizatının istehsalı və ixracı üzrə regional bazanın yaradılması, ölkənin səmərəli tranzit informasiya mərkəzinə çevrilməsi, formalaşan informasiya cəmiyyətində insan resurslarının hazırlanması və inkişafı, müxtəlif sahələrdə informasiya texnologiyalarının tətbiqi və s. nəzərdə tutur.
Məqalə müəllifi ilə əlaqə ünvanı: [email protected]
