Azərbaycan, Bakı, 25 may /Trend, müxbir, Q.Vəliyev/
Təhsil portalı www.edu.az çərçivəsində məktəblilərin dərsdə müvəffəqiyyətləri və davamiyyətləri barədə məlumat əldə etmələri üçün səhifə yaradılıb. Bu barədə Təhsil Nazirliyinin məlumatında deyilir.
Layihə 2008-2012-ci illər Azərbaycanda təhsil sisteminin informativliyi üzrə Dövlət Proqramı çərçivəsində həyata keçirilir.
Səhifədə məktəblilərin gündəlikləri və davamiyyət jurnalı yerləşdirilib. Proqram vasitəsilə məktəb rəhbərliyi, müəllimlər və valideynlərlə interaktiv ünsiyyət, məktəbin fəaliyyəti ilə bağlı xəbərlərlə tanışlıq (valideyn iclasları, iməciliklər) imkanı verilib.
Məktəbin idarəedilməsi proqramı online rejimdə qiymətləndirməyə imkan verir və elektron jurnalda öz uşağının qiymətini görə bilən valideyn cari məlumatdan avtomatik istifadəyə qoşula bilir.
Valideynlər üçün nəzarət səhifəsi gündəliklərin daimi yoxlanması zərurətini aradan qaldırır. İnformasiya baxımından elektron nəzarət səhifəsini valideyn iclasında iştirakla da müqayisə etmək olar. Valideynlər iclasda iştirak etmədən bu nəzarət səhifəsi vasitəsilə bütün zəruri informasiyanı əldə edə bilərlər.
Nəzarət səhifəsinin üstünlüyü uşağın dərsdəki uğurları və davamiyyəti barədə interaktiv informasiya əldə edilməsi, məktəb rəhbərliyi, müəllimlər, valideynlərlə və digərləri ilə interaktiv ünsiyyət qurmaq imkanı əldə etməkdən ibarətdir.
Bu gün "Elektron təhsil sistemi" elitar gimnaziyalarda və Bakının 10 pilot məktəbində tətbiq edilir. Yaxın vaxtlarda sistemə qoşulan məktəblərin sayı artırılacaq.