Azərbaycan, Bakı, 23 iyul /Trend, müxbir Q.Vəliyev/
İlin sonunadək Azərbaycan Rabitə və İnformasiya Texnologiyaları Nazirliyinin "Teleradio" İstehsalat Birliyi Lerik, Şirvan və Gəncə rayonlarının ərazisində rəqəmsal televiziya yayımının əhatə dairəsinin genişləndirilməsini başa çatdıracaq. Bu barədə Trend-ə cümə günü "Teleradio" İstehsalat Birliyinin texniki direktoru Mikayıl Abbasov deyib.
Abbasovun sözlərinə görə, yaxın vaxtlarda "Teleradio" İstehsalat Birliyinin yayım üçün televiziya ötürücülərinin və digər lazımi avadanlığın alınması üzrə elan etdiyi tenderin qalibi müəyyən olunub.
Hazırda rəqəmsal televiziya Bakı və Abşeron yarımadasının ərazisində təcrübi istismara verilib. Rəqəmsal televiziya yayımı MPEG-4 standartında həyata keçirilir. Televiziyanın rəqəmsal standartına keçmək üçün əhali dekoderlər almalıdır. Bu qurğuların dəyəri 40-50 manatdır. Bundan başqa, bazarda dekoderləri quraşdırılmış televizorlar artıq almaq mümkündür.
"Qarşıdakı planlara uyğun olaraq, ilin sonunadək 10 televiziya kanalından ibarət bir sosial paket regional səviyyədə istismara veriləcək. Paket Teleradio Yayımı üzrə Milli Şura tərəfindən təsdiq olunacaq. Bakı və Aşeron yarımadasının ərazisində rəqəmsal televiziya kanallarının sayı isə 20-yə çatdırılacaq", - Abbasov bildirib.
Rəqəmsal formatda təqdim edilən yerli kanallar arasında Az TV, İctimai Televiziya, İdman Azərbaycan, Lider TV-ni göstərmək olar. "Teleradio" bütün milli telekanallara rəqəmsal yayıma keçidlə bağlı müraciət edib.
Əvvəllər Abbasovun bildiridiyi kimi, ilin sonunadək Azərbaycan ərazisinin 50 faizi rəqəmsal standart televiziya yayımı ilə əhatə olunacaq.
Azərbaycanda rəqəmsal televiziya yayımının inkişafı nazirlik qarşısına qoyulan prioritet vəzifələrdən biridir. Nazirlik yaxın vaxtlarda bütün respublika ərazisi üzrə rəqəmsal televiziyanı yaymaq niyyətindədir.
ITU (International Telecommunication Union) bütün ölkələri 2015-ci ilədək rəqəmsal televiziyaya tam keçməyi tapşırıb. Tədbirlər planına əsasən, Azərbaycanda rəqəmsal televiziyaya tam keçid 2013-cü ildə nəzərdə tutulub.
Yayımın yeni standartına keçidlə əhaliyə yeni qeyri-ənənəvi televiziya xidmətlərinin göstərilməsi imkanı yaranacaq. Əlavə kanallara və xidmətlərə qoşulma qiyməti, onların say etibarı ilə müəyyən ediləcək.
