Azərbaycan, Bakı, 9 avqust /Trend, müxbir Q.Vəliyev/
Azərbaycanın İT şirkəti "Sinam" Azərbaycan Mərkəzi Bankında bank nəzarətinin idarə edilməsi üzrə informasiya sisteminin tətbiqinin ikinci layihəsi üzrə işləri başa çatdırıb. Bu barədə şirkətin məlumatında deyilir.
İlk iki mərhələ üzrə işlər müxtəlif qrafik formaların yaradılma imkanlarını daxil etməklə, hesabatların generasiyası sisteminin tətbiqini, eləcə də bankda əvvəllər istifadə olunan "FinA" sisteminə və elektron poçtun arxivləşdirilməsi, onun idarə edilmə sisteminə inteqrasiyanı nəzərdə tutub ki, bu da "e-mail" serverin disk məkanından daha da səmərəli istifadə etməyə və arxiv məlumatlarını idarə etməyə imkan verib.
Ümumilikdə, layihəyə beş mərhələ daxildir və hazırda şirkət üçüncü və dördüncü mərhələlər üzrə işə başlayıb. Onların ilin sonunadək başa çatdırılması planlaşdırılıb.
Üçüncü mərhələdə bank təşkilatlarının və qeyri-bank kredit təşkilatlarının idarə edilməsinin həyata keçirilməsi göstərilib. Bu mərhələdə bank daxilində sənəd dövriyyəsi sistemindən keçən sənədlərin avtomatik yeniləşdirilməsinin həyata keçirilməsi, eləcə də idarəetmə üçün lazım olan bütün informasiyanın daxil edilməsi və təhlili nəzərdə tutulub.
Dördüncü mərhələ Mərkəzi Bankda aparılan layihələrin idarə edilməsi sistemini əhatə edir. Bu sistem sənəd dövriyyəsi sistemi ilə əlaqəlidir.
Beşinci mərhələyə daxil olan sənədlərin skanerləşdirilməsi və tanınması, onların müvafiq biznes-prosesə və həyati dövrəyə qoşulma imkanı olan sənəd dövriyyəsini özündə birləşdirir. Daxil olan sənədlərin tanınması sənədin məzmunu üzrə kontekst axtarışı həyata keçirməyə imkan verəcək.
