Azərbaycan, Bakı, 25 avqust /Trend, müxbir H.Vəliyev/
Azərbaycanda son istehlakçılar üçün internet tariflərinin azaldılmasının yeni dalğası gözlənilir. Bu barədə Trend-ə İnformasiya Problemlərinin Araşdırılması Mərkəzinin rəhbəri Yaşar Hacıyev bildirib.
Onun sözlərinə görə, buna səbəb ilkin provayder Delta Telecom tərəfindən kanalların icarə haqqının növbəti azaldılmasıdır.
"Genişzolaqlı istifadə üzrə abunəçi bazasının yaxın vaxtlarda qəfil artımını gözləməyə dəyməz. Provayderlər özləri Dial up-dan istifadə payının müştəri bazasının ümumi sayında üstünlük təşkil etməsini gizlətmirlər. Güman edirəm ki, ADSL trafikinin 1,5 Mbit/s-nin 10 manat səviyyəsinədək azaldılması özünü doğrulda bilər və bununla da bu xidmətdən istifadə edənlərin sayının tədricən artmasına kömək edər", - Hacıyev qeyd edib.
Ekspertin fikrincə, ümumilikdə Azərbaycanda həm internet, həm də informasiya texnologiyaları bazarının inkişaf dinamikasında son ildə böyük irəliləyiş qeydə alınıb.
İnternet seqmentində son istifadəçi üçün qiymətin təyin edilməsinə xüsusi diqqət yetirilir, internet xidmətlərinin yeni təchizatçıları əmələ gəlir, tənzimləyici siyasət təkmilləşdirilir. Buna böyük xidməti Rabitə və İnformasiya Texnologiyaları Nazirliyi, ictimai təşkilatlar və internet-birliklər göstərir.
"Son illər ali və orta təhsil müəssisələrində kompüter siniflərinin sayı xeyli artıb, informasiya texnologiyaları fənninin "canlı" treninq metodunun tətbiqi yolu ilə tədrisinin səviyyəsi artıb. Getdikcə daha çox gənc proqram dillərinə yiyələnməyə maraq göstərir ki, bu da onlara öz intelektual əməkləri ilə pul qazanmağa şərait yaradır", - araşdırma mərkəzinin rəhbəri qeyd edib.
Hazırda əhaliyə təklif edilən elektron xidmətlərin sayının genişləndirilməsinə, regional səviyyədə genişzolaqlı internetin inkişafına və genişzolaqlı ADSL-ə qoşulmaq üzrə bürokratik əngəllərin aradan qaldırılmasına ehtiyac duyulur ki, bu da bəzən 20 günədək davam edir.
