Azərbaycan, Bakı, 30 sentyabr /Trend, müxbir H.Vəliyev/
Azərbaycan Milli Elmlər Akademiyasının (AMEA) İnformasiya Texnologiyaları İnstitutu (İTİ) Akademiyanın "ElmNet" şəbəkəsinin infrastruktur şəbəkəsinin genişləndirilməsinə başlayıb. Bu barədə cümə axşamı Trend-ə İİT-dən bildiriblər.
İşlər şəbəkənin modernləşdirilməsini, funksional imkanların və keyfiyyətin artırılmasını nəzərdə tutur. İnstitut Akademiyanın bir neçə strukturunu birləşdirən "ElmNet"in şəbəkə infrastrukturu üçün internet-mərkəzin yaradılması üzrə işləri başa çatdırıb.
Şəbəkə xarici elm-təhsil şəbəkələri ilə informasiya mübadiləsinin təşkilini, informasiya resurslarını toplamağı və Elmlər Akademiyasının şöbələri arasında informasiya dəstəyini nəzərdə tutur.
Layihə qarşısında üç başlıca məqsəd qoyulub: beynəlxalq əlaqələrin qurulmasına yardım, tədqiqat və akademiya şəbəkələrinə daxilolma, şəbəkə infrastrukturlarının və informasiya mübadiləsinin artımına imkan yaradılması, habelə şəbəkə ilə işləmək üçün personalın hazırlanması.
Layihə inkişaf mərhələsindədir və hazırda əsas diqqət son istifadəçiyə yönələn servisə cəmləşib. Nəzərdə tutulur ki, şəbəkənin əhatə miqyası daim artacaq.
Akademiyanın "ElmNet" şəbəkəsində məlumatların ötürülmə sürəti 100 Mbit/s-i ötür. Akademiyanın şəbəkəsi üç istiqamətdə - Geologiya, Fizika və Kibernetika institutları istiqamətində çəkilib. Üç seqmentin hər biri Elmlər Akademiyasının yaxınlıqda yerləşən digər strukturlarını birləşdirir. Akademiyanın şəbəkəsinə cəlb edilən kompüterlərin sayı 1400-ə çatır.
İnformasiya Texnologiyaları İnstitutu tərəfindən elektron təhsilin şəbəkə infrastrukturunun formalaşdırılması üzrə yığcam təhlil hazırlanıb və plana əsasən, 2012-ci ilədək internetə çıxışı olan elmi müəssisələrin şəbəkə infrastrukturu, maddi-texniki bazası və daxili korporativ infrastrukturu yaradılacaq.
