Azərbaycan, Bakı, 7 oktyabr /Trend, müxbir H.Vəliyev/
Yaxın vaxtlarda Avropa İttifaqı Azərbaycana "eTwinning" məktəb tərəfdaşlığı layihəsində iştirak üçün əsas kriteriyaları təqdim edəcək. Bu barədə Trend-ə cümə axşamı Təhsil Nazirliyi yanında Təhsil sisteminin informasiyalaşdırılması idarəsinin treninq və monitorinq şöbəsinin direktoru Ramil Süleymanov deyib.
Süleymanovun sözlərinə görə, Azərbaycanın "eTwinning" layihəsində iştirakı məsələsi Aİ-nin "eTwinning" proqramı çərçivəsində oktyabrın 4-5-də Moldovada keçirilən "dəyirmi masa" zamanı müzakirə edilib.
"Azərbaycanda bu platformaya uyğunluq üçün bütün lazımi şərait var. İldən-ilə informasiya-kommunikasiya texnologiyaları təhsil müəssisələrində daha çox istifadə olunur, elektron təhsilin tətbiqi üzrə imkanın olması isə Azərbaycana bu platformaya Cənubi Qafqazın digər ölkələrindən daha tez qoşulmağa imkan verir. Lakin son qərar bu layihəni qiymətləndirəcək hökumətdən asılı olacaq", - Süleymanov bildirib.
Onun sözlərinə görə, indi Avropa Komissiyasının əsas məqsədi bu platformaya Şərqi Avropa məktəblərinin qoşulmasından ibarətdir.
Avropa Komissiyasının təşəbbüsü ilə yaradılan "eTwinning" portalı tərəfdaş məktəblərin görüşü üçün virtual meydançadır. Bu portal vasitəsilə müxtəlif ölkələrin məktəbliləri bir-biriləri ilə ünsiyyət qura, mədəniyyyət və tarix haqqında informasiya mübadiləsi edə bilərlər. Proqram artıq beş ildir həyata keçirilir və bu dövr ərzində internetlə müxtəlif ölkələrdən olan minlərlə müəllim və şagird arasında əlaqə yaradılıb.