Azərbaycan, Bakı, 6 dekabr /Trend, müxbir H. Vəliyev/
Azərbaycan Rabitə və İnformasiya Texnologiyaları Nazirliyi rabitə xidmətlərinin qiymətində dəyişikliklər etmək barədə təkliflə Tarif Şurasına müraciət edib. Bu barədə bazar ertəsi Azərbaycan rabitə və informasiya texnologiyaları nazirinin müavini İltimas Məmmədov deyib. O, hansı tariflərdə endirim, hansında artım olacağını dəqiq deməyib.
Məmmədovun sözlərinə görə, Tarif Şurasına baxılmaq üçün təqdim olunan təkliflər rabitə operatorları ilə müzakirə olunub.
"Dəyişikliklər beynəlxalq və şəhərlərarası rabitə xidmətləri tarifinə, eləcə də abunəçiyə telefon xətlərinin çəkilməsinin dəyəri və stasionar telefon istifadəsinə görə aylıq abunə ödənişlərinə aiddir. Bu gün yekun qərar Tarif Şurası üzərində qalır, qərar qəbul olunduqdan sonra bu məsələ ilə bağlı nəticələri aşkar açıqlamaq olar", - Məmmədov deyib.
Nazir müavininin dediyi kimi, bir xidmət növünə tariflərin artırılması digərlərinin dəyərinin aşağı düşməsi ilə əvəz olunur, məsələn, beynəlxalq danışıqların tarifi.
"Yeni tariflərin tətbiq edilməsi rabitə operatorları arasında rəqabət üçün zəmin yaradacaq və nəticədə istifadəçilər udmuş olacaqlar", - Məmmədov deyib.