Azərbaycan, Bakı, 6 dekabr /Trend, müxbir H.Vəliyev/
"Dilmanc"ın nitqin tanınması sistemi "109" saylı servisin bazası əsasında informasiya-sorğu xidmətlərinin təqdim edilməsi üçün sınaq istismarına tam hazırdır. Bu barədə Trend-ə bazar ertəsi "Dilmanc" layihəsinin rəhbəri Əbülfət Fətullayev deyib.
Onun sözlərinə görə, sorğu məlumatının verilməsi üçün "Dilmanc"ın nitqin tanınması sistemindən istifadə operatorun sisteminin "109" saylı xidmətin bazasına inteqrasiya hazırlığından asılı olacaq.
"Nitqin tanınması sistemi səsli komandalar vasitəsilə RSS-kanallardan xəbərləri yığmağa, kitabxananın elektron bazasında axtarış aparmağa və danışanın tələb etdiyi ədəbiyyatın olması haqqında məlumat verməyə, elektron poçtu idarə etməyə, poçt qutusunda elektron məktubların olması barədə xəbər verməyə, məktublara cavab verməyə və s. imkan verir. Sistem sorğu məlumatının verilməsinə tam hazırdır və bizə onun "109" saylı məlumat xidmətinə inteqrasiya edilməsi tapşırılarsa, bu məsələ bir il ərzində həll edilə bilər", - Fəyullayev bildirib.
Bazar ertəsi Bakı Telefon Rabitəsi İstehsalat Birliyinin baş direktoru Beytulla Hüseynovun sözlərinə görə, nitqin tanınması sistemi "109" saylı sorğu xidmətinə yenidənqurma işləri başa çatdıqdan və xidmətin elektron şəklə salınmasından sonra inteqrasiya ediləcək. Onun sözlərinə görə, bunun yaxın vaxtlarda başa çatdırılması gözlənilir.
"Dilmanc" sisteminin "109" saylı xidmətin informasiya bazasına inteqrasiyası rabitə və informasiya texnologiyaları naziri Əli Abbasovun tağşırığına əsasən həyata keçiriləcək.