Azərbaycan, Bakı, 2 aprel /Trend, müxbir H.Vəliyev/
Azərbaycan "Speedtest" xidmətini yaradan "Ookla" şirkətinin "Net Index" reytinqində daxil olan internet trafikin sürətinə görə dünyada 120-ci yeri tutub.
Nəticələr martın 2-dən 31-dək keçirilən sınaq tədqiqatları əsasında əldə edilib. Sınaqların keçirilməsi üçün 98 748 unikal IP ünvanı seçilib.
"Net Index" reytinqinə əsasən, Azərbaycanda daxil olan trafikin orta sürəti 2,09 Mbit/saniyə təşkil edir. Reytinqdə tədqiqatın keçirilmə müddətində daxil olan trafikin sürəti 8,41 və 0,40 Mbit/saniyə təşkil edən Azərbaycanın iki qabaqcıl provayderi - "Delta Telecom" və "Baktelekom" şirkətlərinin statistik göstəricilərinin nəticələri öz əksini tapıb.
İstifadəçilərin şəbəkəyə 0,99 Mbit/saniyədə daxil olduqları çıxan trafikin reytinqi üzrə Azərbaycan 99-cu yeri tutub.
Reytinqdə tədqiqatın keçirilmə müddətində çıxan trafikin sürəti 7,54 Mbit/saniyə (AzEduNet Azərbaycan təhsil şəbəkəsi) və minimum sürəti 0,40 Mbit/saniyə (Azercell Telekom şəbəkəsi) təşkil edən Azərbaycanın provayder və rabitə operatorlarının 20 internet-servisinin statistik göstəricilərinin nəticələri də öz əksini tapıb.
